CHIN FOR CHRIST IN ONE CENTURY [CCOC] IN ICBM RIANTUANNAK

Pathian nih A Fapa ngeihchun Jesuh Khrih in kan khamhnak lam a serning hi minung nih kan ruah phak lo a si.  Van le vawlei le a chung ummi A ser lio ah a awl ngai.  A bia in "Um seh" a ti hna i an um diahmah ko.  Nain, a rawkmi remh cu Pathian ca zong ah a har tuk ko rua.  Minung kan rawkmi hi a rak faak tuk.  Zei dang in khamhnak lam dang a um lo.  Khrih thihnak in khamh haumi hrimhrim kan rak si.  Cu caah, kan thih ding canai ah Khrih cu vailamtah cung ah thihnak fak bik tuar in A nunnak a kan pek.  Khrih a hngal i a zummi nih khamhnak kan hmu.  Hi Thawngtha hi lei khua zakip ah chim ding in thothan Khrih nih a kan fial [Matthai 28:19].  Khrih thisen in khamhmi le tlanhmi hna nih kan chim lo ahcun a chim kho ding an um lo, thisen in khamh an si lo caah vanmi hmanh nih thisen khamhnak hla hi an sa kho lo.  Nang le kei cu kan kal a hau ko.  Hi Thawngtha a hngal taktak mi nih an i umpi kho lo.  Khrih Thawngtha chim hi an duh bik.  An nunnak hmanh an pek ngam.

A tu lio cu ICBM Awareness Program in Chinram in Rev. Peng Thang, Rev. Sing Kee Ling le Lg. Noami Par Tha Sung nih CBCUSA churches kip ah Thawngtha an chim lio a si.  June in an thok i October 15, 2017 ah an dih lai.  

[cung] Rev. Arthur Carson cu a chuah khua hi kal taak in Chinmi kan sin ah Khrih Thawngtha chim ah a nupi Laura Carson he Hakha khua cu March 15, 1899 ni ah an rak phan.