American Baptist Churches USA [ABCUSA] Biennial Civui, Portland, Oregon, June 30-July 2, 2017

Oregon Convention Center ah tuah a si lai. ABCUSA tuanbia thoknak cu a tam ngai. 1814 kum ah siangbawi te bawmhnak caah Foreign Mission Society hi an thok. American Baptists nih an uarbikmi cu Jesuh Khrih Thawngtha chim a si. Rev. Adoniram Judson le Ann Judson cu Yangon, Myanmar ah July 13, 1813 ah an ra. Khrih Thawngtha chim an thok. Rev. Arthur & Laura Carson cu March 13, 1899 ni ah Hakha khua ah an ra i Khrih Thawngtha cu an kan chimh. Cu ti cun, Khrih zumtu khrihfa ah kan cang.

American Baptist Churches USA cu ram dang ah Thawngtha an chim. Myanmar ah missionaries tambik an thlah. An thih hnawh bak ve. Nihin ah Myanmar ah Baptists cu American Baptists nak in kan tam deuh. Khrihfa tuanbia rel tik ah Baptists le Mission cu aa then kho lo. Khrih Thawngtha chim ruang ah nunnak tampi an pek ngam. An chim lawng ah an thlarau di a riam.

Kannih Chinmi zumtu hna zong American Baptists nih thlarau in hrinsormi kan si. Harnak tampi chung in hi dirhmun ah kan phak khawhnak cu Khrih le kan Chin miphun caah nunnak a pemi Rev. Arthur Carson and Laura Carson thok in siangbawi chungkhar dihlak 7 hna riantuannak in a si. Kan Chin khrihfabu tuanbia nih philh khawh lo ding in a tial dih. 

ABCUSA Biennial Civui cu linsa ngai in kan hmang ko lai hi. Hi civui ah Praise and Worship ah Lg. Minoca Uk [CBMC, DC] aa tel ve lai. Kansas City ah rak tuah lio ah amah le Rev. Chan Hnin Thui an rak i tel cang. ABCUSA upa pawl zong an i lawm taktak ve. Kum caan tawi te chung ah hi dirhmun ah nan phak khawh cu! an ti. Pathian nih a kan cawisan ciahmah ko.

Kei zong Nizan 6/26/2016 ah Portland, Oregon ah ka phan. ABCUSA Board of General Ministries [BGM] ah 2006 kum in kaa tel ve caah nihin in meeting kan thok lai. BGM cu ABCUSA riantuannak policy tlaitu a si. Kan civui kong hna theih ve nan duh sual ah kan thanh pah te hna lai. A tang hotel ah meeting kan tuah lai.  Zarh khat kan cam lai.

Portland, Oregon cu khua dawh ngai a si. Pe 11,245 a sangmi Mount Hood nih a dawh ter.  A nuamh ter.  Hawhra nih a khuh rih ko.  Vanlawng cung in zoh a dawh ngai.

**************************************

ZOTUNG BAPTIST CHURCH, DC SUNDAY WORSHIP SERVICE 

[JUNE 25, 2017]

Kan leeng hna.  Bawipa Zanriah kan serpiak hna.  Pastor an ngei rih lo.  Mi tlawm an si nain, lungfim tein an um.  Khua an ruahning a pipa ngai.  Zotung Baptist Association, Rezua cu CACC rak thoknak ah Matu Baptist Association he tuanbia tialtu an si.  Bu riantuannak ah tel hi a biapi ngai.