CBCUSA NEWSROOM

HLA NGAIH PAH IN CAREL HI A NUAM NGAI.
"Laimi le Vailam then kho lo" ti mi hla hi ngaih pah ding ah. You tube hla a si caah hla dang nih a peh ahcun phit te ko law.
Mitthlam Na Cuang
Hniang Hniang le Jenny le Tlem Tlem

CBCUSA BOARD OF TRUSTEES [CBCUSA BT] MEETING

I. Hmun: Chin Baptist Church, Marshalltown, Iowa
Ni thla: March 6 - 8, 2015

1. Meeting kaimi [mileeng tel in] dihlak 130 an si. CBCUSA chungtel thar pariat hna cohlannak an tuah. Chungtel khrihfabu dihlak 93 an si. Milu 23, 000 reng lo pi an si. CBCUSA ramchung le ram leeng rianttuannak a thancho deuhnak ding ah cantling rianttuantu thar tam deuh in ngeih an duh:
1) Mission Director
2) Youth Department Director
3) Women Department Director
4) Office Secretary an si.

[tang] BT meeting a kaimi palai hna

[tang] CBCUSA Officers an si.

2. CBC, Marshalltown zumtu hna nih tlamtling tuk in an kan zohkhenhnak cungah kan lunglawmhnak roca kan tial. A ho dah an pastor cu a si? nan ti men lai. An pastor cu Tukhal Tha Jesuh Khrih a si. An church chairman Pu Thawng Za Lin le mino le nu upa tangrual hna nih nuam tuk in a kan tuah.

3. Khuasik hawhra a tlak lio a si caah BT palai tampi cu an i tinhmi can ah phan kho lo in an vanlawng a tlai hna. Lungsau tein airport ah an hngah hnu ah meeitng ah an rak kai kho hna. Pathian dawtnak in kum khat hnu kum khat in kan thanchonak cu hmuh khawh a si. Duhfak ngai in riantuan a duhmi an tam.

II. INTERNATIONAL CHIN BAPTIST MISSION [ICBM]

July 13, 2013 cu CEBC, Indianapolis, Indiana ah Pathian sin ah pekchanhnak a tuah. Ram kip in Laitlai Chin khrihfabu hna nih an kan telpi. Local missionaries 66, field directors 4 he Gangaw, Mindat, Kanpalet le Paletwa peng ah an thlah hna. Zumtu thar 92 an hmuh cang hna.

Thlarau tlaumi hna tlaihnak mission rian kan tuan tam paoh ah Khrih Thlarau cu kan lak ah i manh lo ngai in rian a tuan ve. Lawmhnak a chuak. Khrihfabu ah rualremnak a tlung. Vawlei vanram kan ti tawn mi kha a tlung.

III. LAI KHRIHFA CATIALTU PHU [LKCP]

Kannih Laitlai Chin pawl hi kan santlai lo ngai. Catial lei ah kan der khun. Cu caah Khrihfa cauk hi kan ngei tam lo. LKCP nih Bible hrilhfiah tial ding in 2007 an thok cang ka tein CBCUSA nih $5000/yr in a bawmh hna. 2011 in $6000/yr in a bawmh hna. Hi LKCP um hna hlah sehlaw a ho nih kan tial khawh ding a si lo. CACC cu a um nain, rianttuantu an tlawm. Hi bantuk catial ahcun scholars tampi i bawmh a hau. Cu caah LKCP [Lai khrihfa catialtu phu) an tuah tikah Bibel thiamsang 30 hrawng an i tel. Khrihfa cauk 14 an chuah cang. 2015 chung ah uk 9 an chuah lai. Cantling riantuantu cu Saya Van Bawi Lian a si. An chuahmi chung in cauk phun khat cu a tang ah kan langhter:

Theih Herhmi: Lai Bible hrilhfiah hi Falam le Tedim holh in an tial cuahmah. Hakha holh in LKCP nih an tial ve. Bible uk 66 hi Laiholh phun thum in an tial khawh tik ahcun kan theih bik mi holh in Bible fianternak kan rel khawh dih lai. Hrilhfiah cauk hna hi a bupi in khrihfabu le Bible sianginn paoh ah kan chiah te lai. LKCP nih hin tial thok hna hlah sehlaw Falam le Tedim holh thiam lo pawl cu kan awlok a chawng lai. LKCP nih rianrang deuh in tial khawh kan zuampiak hna sehlaw kan i lawm tuk lai. Hi Lai Bible Hrilhfiah cu Mizoram chung um Laimi le Bangladesh um Laimi nih an i hrawm ve ding mi a si. A biapi taktak.

IV. CBCUSA CHRISTIAN EDUCATION & LITERATURE DEPARTMENT

Ramdang Lai fa hna nih Khrih zumhnak he an thancho khawh nak ding ah le kan ca le holh hi an thiam i kan miphun an nunpi khawh nak ding ah Sunday School Cauk cu Director Saya Thlasui Tluangneh nih voikhat a kan chuahpiak cang. Hi cauk cu Australia, New Zealand, Europe ram [Norway, Denmark, Germany, Sweden] le North America [Canada le USA] ram dihlak ah kuat a si. A rauh hlan ah vawihnihnak a chuah than lai.

Kan ca le holh a nun lawng ah ramdang kan miphun a nung kho lai. Cu caah, CBCUSA mino hna nih Lai hla tein Pathian thangthat kho hna seh ti kan duh. Lai holh fa tete thiam lawng in a za lo. Minung thong 10 hrawng nih thiammi holh nih cun kan fa le hi Laimi a si ter kho peng hna lai lo. Cu caah kan thiam bik mi holh hi kan i hrawm khawh a hau. Kan cawn cio a hauhnak a si. Chan nih a luanpi mi a si cang. Mi tlawm te nih thiammi holh kan dirpi ahcun kanmah le kan fa le he ramdang ah kan tlau tuan sual ko lai. Kan miphun hi Pathian bia nih kilveng sehlaw nung zungzal ko seh ti kan duh caah Lai ca le holh hi thiam cio kan hau tiin kan chim lengmang nak a si. Kan ruat thiam tawn u.

CBCUSA Executive Minister Dr. C Duh Kam Myanmar Tlawnnak

January 31, 2015 in Washington, DC in aa thawh i February 25, 2015 ah a rak kir than. American Baptist Churches USA General Secretary Dr. Roy Medley le a hawi le he an tlawng:

1. Mitkyina, Kachin State ah an kal. Raldohnak ruangah inn lo kaltaak in harsa taktak in ramchung ralzaam riakbuk ah khuasa mi hmun hnih ah an leeng hna. Kachin Baptist Convention ah cawnpiaknak le Pathian thangthatnak an ngei. Kachin State Chief Minister zong an ton.

[tang] Zion Baptist Church, Mitkyina

Member thong li an si. Sunday ah phung ka chim.

2. Yangon ah an rak kir i Napyidaw ah Pu Aung Min le Pi Aung San Suh Kyi zong an ton hna. Cu hnu ah US Ambassador Pu Dereck Michell le a rianttuan hawi zong an ton hna.

4. February 13 in 20 tiang kha Thlang Lairam ah an tlawng. Monywa in Kapalet in Mindat in Matupi in Rezua in Gangaw in Monywa ah an tlawng. Thlang Lairam ah Chak Laimi nih rian an tuannak vialte hmuh tikah thanuamnak nganpi an ngei. Victoria tlangpar zong an kai hna.

[cung] Laimi le Vailam then kho lo. Victoria tlang cung ah a sannak bik bo ah Buddhist pura an sak. A niam deuhnak bo ah hi vailamtah hi an tuah.

LAI THIL THUAM CU AA DAWH KO