KAN LUNGLAWMHNAK le NGAIHCHIATNAK
BAWIPA KUT CHUNG AH

November 2014 chung ah kan Chin miphun lak ah philh khawh lo mi thawng an thang hna:  

1. LUNGLAWMHNAK:

Lawngtlai, Mizoram ah vawlei pi cung biaknak hruaitu hna tonnak ah Chin khrihfabu zumtu hna hi thlarau thazaang i hlum in rianttuan tti kho ding in November 15, 2014 ni ah "International Chin Christian Fellowship [ICCF]" cu dirh a si.  Hi tonnak ah aa sawmmi hna cu Chin zumtu hna kan rianttuannak ram (continent) hna aiwah mi buu lian pipi an si:
1) Chin Christian Association for Christian Communication [CACC], Hakha, Chin State
2) Chin Baptist Churches USA [CBCUSA], Indianapolis, Indiana
3) Chin Christian Association in Europe [CCAE], Norway, Europe
4) Chin Christian Council in Australia [CCCA], Melbourne, Australia
5) Evangelical Christian Church [ECC], Bawm, Bangladesh
6) Lairam Jesus Christ Baptist Church [LJCBC], Lawngtlai

Hi biaknak buu hna nih an sining an i fiang.  Harnak chung in Bawipa Pathian nih A chanhchuah i A dawtmi miphun an sinak an hngalh.  Nain, an ral a chiatnak nganbik pakhat tu cu "Miphun dang lak ah tlau sual lai" hi an phang taktak.  Kum 60 reng lo mah ca le holh cawng ti lo in, mah ca le holh thiam lo mi kan tam cu hngalh cio a si.  Mah nunphung zong a thlaumi kan tam cang. Miphun dang lak ah khua kan sak ruang ah kum tampi chung mah ca le holh le nunphung a thlaumi hrimhrim kan tam.   Ca le holh le nunphung hi kan minung muisam a sertu a si caah kan thlau tikah miphun dang muisam hmanh kan pu kho.  Cu caah, kan tlau cang mi le kan tlau lan sual lai ti phang in kan umnak ram kip ah kan miphun sining tein Pathian thangthat hi kan duhmi a si.  Pathian nih A kan duhpiakmi a si.  Bawipa ramkauhnak rian hi kan umnak hmun cio ah le kan Chinram ah ttuan tti ding cu kan thlacamnak a si.  Bawipa, Na min thang ttha ko seh!  To God be the glory!

 [cung & tang] A lai thu mi hi Mizoram Chief Minister Pu Lalthanhawla Sailo

 [tang] Ram kip in Chin Christian Leaders

2. NGAIHCHIATNAK:

Kan miphun lak ah lawmhnak tuanbia thar aa ttial lio ah ngaihchiatnak tuanbia zong aa ttial ve tthan.  Philh khawh lo ding mi tuanbia an si hna.  November 19, 2014 ni ah kan unau Kachin hna hmunpi Laiza ah miakpi aw thangpi in a ring.  "Ram le miphun caah" tiin a nunnak a hmang lio mi kan fanau le minung 23 nunnak a liam.  Cu chung ah CNA Cadet J. Biak Tin Lian le Cadet Ram Hngak zong na i tel ve ti thawng kan theih.  Hliam hma pu tampi an um rih.  Kan miphun nih ngaihchiatnak fak pi in a ton.  A ni le caan nih a pek tuk cang caah "A dawtmi hna umnak vawlei ah daihnak um ko seh" timi Xmas sermon hi ram kip in theih ding kan hngah lio ah miakpi aw tu a thang hmasa.  Kan ruah ti lo hnu ah.  Kan Bible kal ning zong a lo pah.  Daihnak Bawi Van Messiah a chuah lio ah Siangpahrang Herod a buai i a awlok a chawn tuk bang.  

Hi ngaihchiatnak kong hi Delhi, India kan phak ni November 20, 2014 ah kan theih ve.  November 21, 2014 ni i Delhi khuasa Chin/Lai khrihfabu hna hawikomhnak ngeih lio ah ram le miphun caah nunnak a pemi kan fa le upat peknak caah dai tein kan kun.  Thla kan campiak hna.  Ram kip in Chin zumtu hna thlacamnak cu Van khuapi Pathian bawi tthutdan lei ah meithang bang an zam.  Chin zumtu hna kan mitthli cu Bawipa thutdan lei ah an luang.  "Bawipa kan dirpi ko, Bawipa kan umpi ko" ti hi Chin zumtu hna thlacamnak cu a si.

Nihin November 30, 2014 Sunday hi cu kan miphun le ram caah kan thlacamnak cu van ah an zuang tti lai.  Kan chungkhar le khua le ram a vengtu Bawipa Pathian lei ah.  Sertu kan Pa sin ah thla cam tti hna usih.  

Dr. C Duh Kam
Executive Minister of CBCUSA
Convener of ICCF