CBCUSA THAWNGTHANH

June 13, 2014

Pathian thluachuah kan dong ko.  Kan miphun nih a si khawh tawk tein a tuahmi ah Pathian nih hna a kan tlak pi i thluachuah a kan pek ko.  A min thiang thang ttha ko seh.

(1) Washington, DC ah a cangmi:

Myanmar Ram Biaknak Phunghram Ahran (Religious Conversion Law)  duh lo nak cu DC area Chin zumtu hna nih Myanmar Embassy Office kam ah an aupi.  Ruah a sur tuk caah ruah ning bantuk in mi an tam kho lo.  Nain, tuah ding in ruahmi cu an tlamtlinh ko.  Duhlonak min tialmi vialte zong Myanmar Embassy Office ah an pek hna. Kan ram caah Pathian sin thlacam cu a herh zungzal.

(2) Green Lake, Wisconsin ah:

(a) DC ah kan hawikom hna an au lio can te ahhin American Baptist Churches USA Board of General Ministries (BGM) meeting cu kan tuah ve.  Myanmar biaknak phunghram ahran kong cu kan ruat hna.  DC ah duhlonak an au lio a si tiah kan chim.  Myanmar ram biaknak kong cu USA ram hruaitu hna sin ah theihter ding in an ruah cio.  A ni le can hi aa khat kho tuk i Pathian khuakhan a si ko tiin ka ruah.  Biaknak zalawnnak a um lo ding cu an phang tuk cio.

(b) Chin Baptist Churches USA (CBCUSA) le Karen Baptist Churches USA (KBCUSA) cu ABCUSA ah Associated Ministry Organization sinak in an kan cohlan veve.  Phung ning tein pehtlaih hnatlaknak catlap cungah ABCUSA President Rev. Don Ng he KBCUSA caah Rev. Ler Htoo le CBCUSA caah kei nih min kan thut.

(c) CBCUSA cu Baptist World Alliance (BWA) nih member pakhat in cohlang ding in hnatlaknak an tuah cang.  July 6-11, 2014 BWA Annual Gathering, Izmir, Turkey ah cohlannak catlap cu CBCUSA President Rev. Ngun Awi le Assistant Executive Minister Rev. Dr. Thlaawr Bawihrin nih an kan lakpiak lai.

(d) Pathian nih kannih Chin zumtu hna zong mi dang caah thahnem kho ding in thluachuah a kan pek.  Mi dang sin in zeidah ka hmuh khawh lai tinak nak in zeidah ka pek khawh ve hna lai ti hi ruat ve ding in A kan thluachuah.


3) ABCUSA kong cu hi www.abc-usa.org/inspired ah hin minthang upa hna bia ngaih khawh a si.  Video Clip kha hmet law an bia na ngaih khawh lai.

[tang] AMO in cohlannak catlap cung min thut lio

 [tang] Karen Baptist Churches USA GS Rev. Ler Htoo nih minthut lio