Denmark le Germany Tlawnnak

(By C Duh Kam, EM)

Leikhuaza Chin khrihfabu hna sin ah kan tlawn tikah ka thlacamnak cu a kan sawmtu khrihfabu hna nih Khrih Thawngtha in thlarau khamhnak le lawmhnak an hmuh cio ding caah a si.  Cun, vawleipi cung Chin Churches hna nih kan semnak Chinram (Lairam) ah rianttuan ti khawhnak ding lam zong ka ruah chih.  CBCUSA nih aa tinhmi cu Khrih ram kauhnak le kan Laica, holh le nunphung thanchonak a si.  Hi rian hi ttuan ti ding in ram kip um Chin Churches hna kha sawm ding ah a si. International Chin Baptist Mission (ICBM) le vawleipi huap in Laica, Laica le Lai nunphung thanchonak cu kan dihlak rian a si caah theihter le sawmnak cu kan tuah lengmang.


Denmark ram (1) Chin Baptist Church, Espia le (2) Chin Baptist Church, Ringe ah Thawngtha chim ding in April 11, 2014 Friday @ 5:05 pm in kan i thawh.  April 12, 2014 zing ah Denmark cu kan phan.  Denmark ram ah kan voikhat tlawnnak a si.  An ram cu aa dawh ngai.  An kan sawmtu khrihfabu le miphun hawi zumtu dihlak cung ah lunglawmhnak nganpi kan ngei.

Billund Airport ah CBC, Espia upa hna he,

Chin Baptist Church, Espia ah Tumkau cawi Zarhpini le Thawhthan Ni kan hmang.
April 17 -20, 2014 chung hi camp ah kan lut.  Chin Baptist Church nih Calvary Mission Church le UPC khrihfabu an sawm hna i khrihfabu pathum komh in Thawngthan Ni tiang kan hmang ti hna.
Boarding School kha an hlan i a siamtling tuk.

[tang] Mino 11 kha hi tidil ah tipil innak kan tuah.  Khua a sik ngai rih i thil lum tak in kaa hruk.

Chin Christian Fellowship, Denmark (CCF DK) Upa hna he tonnak

CCF DK cu CBCUSA nih tuahmi ICBM rianttuannak ah aa telmi an si bantuk in April 20, 2014 Easter Sunday pumh khawh ah CCF DK upa hna he tonnak kan ngei.  Hi mission riantuannak kong theihternak tuah pah in lawmhnak bia ka chim.  Hi rianttuannak ah hi nak cak deuh in i tel ding ah ka sawm hna.  Hi upa cu Europe Chin churches hruainak Chin Christian Association of Europe (CCAE) ah upa an si tthiam hna.  Kan i tonnak cu hmailei rianttuannak ah bawmtu a si lai tiin thanuamnak ka ngei.

[tang] Hlasak thiam Lg. Zo Iang Mawi

Kan camp ah hla a kan sakpiak.

[tang] Chin Bapatist Church, Ringe, Denmark ah Canhmannak

(1) Chin khrihfabu pathum hna cu December 26, 2013 ni in bu khat ah an i komh.  An sin ah khrihfabu hruainak le zumhnak kong cawnpiaknak kan ngei.  Ningani zan le Zarhteni ah cawnpiaknak le Pathian thangthatnak kan ngei ti hna.

(2) Pathian thangthatnak Zarhpini ah an area chung Denmark Baptist khrihfabu dang pali he kan ngei ti hna.  Denmark holh le Mirang holh in can kan hmang.  Denmark ah a phanmi Laimi cu Denmark holh le ca cu kum thum chung an cawn ter hna caah Denmark holh hi an thei ngai.  Kei nih Mirang holh in phung ka chim i Denmark Pastor pakhat nih Denmark holh in a leh.  Laiholh in chim a hau lo.  Chuncaw zong anmah Denmark pawl he hmun khat ah kan ei ti hna.

(3) Denmark ram ahcun cacawn a duhmi paoh cu Denmark cozah nih phaisa a pekpiak dih hna.  Chin mino nih zuamnak an ngeih ahcun cathiam tampi an chuak kho te lai.  Miphun nih bochan mi hruaitu an chuak kho lai.  Mino pawl zong ka forh pah len hna.

Germany ram Frankfurt khua ah Chin Agape Church zumtu hna he Pathian thangthatnak

Denmark ah program pahnih kan ngeihmi can karlak ah Frankfurt, Germany ah kan va tlawng ta. Germany ah Laimi tampi an um lo.  Minung 100 reng lo a ummi Chin Agape Church hi kan miphun aiawh mi khrihfabu a si ko.  An upa le he hna zong in bia kan i ruah kho hna.  An khrihfabu he voihnih Pathian kan thangthat kho hna i kan i nuam ngai.  Thlacam piak zong an herh ngai.  Ram dang ah a ummi fanau le hi an umnak ram holh in an holh, Laiholh hi an philh sual lai ti phan a um ngai.  Laiholh kan thiam lo ni cu kan miphun a tlau ni a si ko lai caah Laiholh cu thiam cio dih i zuam u tiah mino cu kan forh pah lengmang hna.  Pathian biakinn kan phanh khawh lawng ah kan Lai miphun kan hmun lai tiin thazaang kan i pe hna.

 [tang] Euro bank a si.  Euro phaisa hi ram 12 nih an hman.  Arfi 12 hi cu ram hna an si.