CBCUSA GS C Duh Kam Khualtlawnnak Report

March 17 – April 19, 2016

Lunglawmhnak:

Pathian nih ka khualtlawnnak ah lam a ka hruai i kaa tinhning tein ka umkal kho. A min thiang ka thangthat.  Thlacamnak in a ka bawmtu CBCUSA upa le zumtu nan dihlak cungah lunglawmhnak tampi ka ngei.

Khualtlawn Timhnak:

2015 kum chung ah Chinram ah Komen thlichia le ruahsur fak ruang ah kan tonmi zatlaak puicimhnak a tuartu hna cu hmu kho ding in caan rem le tha cu ka zoh ve lengmang lio ah Chin Baptist Convention (CBC) kumthum voikhat khawmpi le CACC BM meeting ah an ka sawm caah Pathian remruat a si tiin Chinram lei tlawn kaa thawh.

Khualtlawnnak:

March 17, 2016 ni ah DC in Yangon lei ah ka zuang.  March 18, 2016 zantim ah Yangon ka phan.    

March 24, 2016 Thursday:

(a)  CBC Triennial Meeting cu kan thok. Meeting a nuam ngai.  Tluangtlam tein biaceih khuakhannak cu a kal tha ngai.  CBC Riantuantu Thar hna thimnak zong dohkalhnak um lo tein an tuah kho.  Zan ah pumhnak kan ngei lengmang.

(b)  Democracy ah i thlen lio le Myanmar le Chin State ram hruaitu hna kha theih i ngaih lio a si.  Mi thinlung aa hliphlau ngai.  Tuan ah Vice President Pu Henry Van Thio kong le Chin State Speaker Pu Zo Bawi kong cu theih a si cang.  Pu Zo Bawi cu khawmh lio ah biatawi chimnak a ngei.  Chin State Chief Minister kong hi kan i ngaihmi cu a si.  Hi CBC khawmpi lio ah CM Salai Lian Luai kong cu kan theih.  Zan pumhnak ah biatawi chimnak an pek colh.  Kuttlaih in lawmhnak kan chimh cio.  Khawmpi a dih hnu ah Chin State office ah CM Salai Lian Luai le Pu Zo Bawi cu an kut ka va tlai kho ve hna.  Chin State ministers hna kong cu kan thei kho rih lo.

March 25, 2016: ICCC Officers Lakhruak Meeting cu CACC office ah kan tuah kho.  International Chin Literature Society [ICLS] min cu a tha in ruah a si.  Leikhuaza Laitlai Chin hna nih kan ca le holh thanchonak hi tuan ti kan hauhnak cu thinlung ah lian bik in a cuang.  Ca le holh kong ah hawi dang nak in kan hnufual tuknak cu hmuh cio a si.  Rian lianpi kan ngeihnak cu hngalh cio a si caah hi bantuk in riantuan tinak a um tikah tha a nuam cio. ICLS cu Laitlai Chin hna ca le holh thanchonak caah riantuantinak bu a si.  Vawleipi huap in kan tuan ti lawng ah kan ca le holh cu a thangcho lai.

March 26, 2016 Saturday): Hakha Rescue Committee [HRC] he tonnak kan ngei.  
      CBCUSA VP Rev. Tial Lian he kan i tel kho. Kokek harnak kong ah rethei bik in riantuantu an si.  An bawmhmi hna a tam taktak.  Hakha khua chung hlei ah khuate tiang in bawmhnak an pek hna.  Hakha ah inn rawkmi 732 a si.  Camps ummi chungkhar cu meihlawl le meh cawknak caah Ks. thong 30/40 an bawmh hna.  Hmun Thar lam an remh.  Lam thar an cawh. Zunput tuahnak caah an bawmh hna.  Innhmun cawhnak ks. ting hnih cio an bawmh hna.  Mithi chungkhar an bawmh hna. Daycare le zan cazohnak an tuah piak hna.  Hakha khua a rawkmi le camps le hmun thar ah kan leeng hna. Khua Hlun inn thing thiarnak caah lam an remh.  An bawmh hna. Hmun Thar ah community hall pahnih sak an i tim.  Khua lak ah tikhur cawhnak ding kong an tawlrel lio.  An phaisa report copy dihlak zong an ka pek.  

March 27, 2016 Sunday: Zion Baptist Church Silver Jubilee le CBC Triennial Khawmpi chung ah Pathian thangthatnak cu a nuam tuk.  Chinram le minung zong an thangcho ve ngai cang i biaknak program zong aa dawh chin lengmang.  Zion Baptist Church nih an biakinn hmun lawng si lo in, hmun tha tuk dang an ngei.  An hmun rawnpi ah mandat an sak.  Ningazan in cu hmun ah Pathian thangthatnak cu tuah a si.  An biakinn ah CBC meeting cu tuah a si.  Pathian thawng in a lamkip in an thangcho tuk.  Inn lo hmun zong a tha.

March 29, 2016 Tuesday: Chin State Government Office ah Chief Minister Salai Lian Luai le Speaker Pu Zo Bawi ka va leeng kho hna.  Kut va tlaih le lawmhnak bia va chim duak khi a si.  An rian tam lio pi si kaw, pumpak caah caan pek a har lio te ah ka hmuh khawh hna i kaa lung si ngai ve.  Zan lei ah Thantlang khua ah kaa thial.

April 1, 2016 Friday: Hnaring ah CACC BM meeting kai ding in kan kal.  Cawngthia khua ah Zophei Baptist Association Office ah kan leeng pah.  Modern Leitak khua ah kan i din i an khua an cuan pah.  Cun, Aibur le Vanthen khua hna kan tan pah.  Hnaring khua cu kan va phan.

April 2-3, 2016 Saturday & Sunday: CACC BM meeting cu tluang ngai tein kan tuah kho hna.  Khual 101 kan si.  Yangon le Mandalay le Association 14 in hruaitu upa mifim an tling.  An meeting ah ngaih nuam ngai in bia an chim hna.  Zan ah Pathian thangthatnak le Zarhpi Chun ah Pathian thangthatnak kan ngei kho hna.  Lautu Association of Baptist Churches nih khual an kan zohkhenhning a tha tuk.  CACC nih tuahmi Chin Idol in hlasak thiam 4 nih an kan telpi.  An kan nuamh ter taktak.  Chinram khrihfabu hna nih mawtor thatha an ngeih khawh cang caah khualtlawn umkalnak ah kan zaang a dam tuk cang.  Pathian thangthat lo awk a tha lo.

April 6, 2016 Wednesday: Hakha in Kalaymyo ah CACC GS Dr. Lal Uk nih Dr. & Mrs. Dennis Shu Muang te he a kan thlah.  Kalaymyo ah Chin Funtomnak Bu upa nih a kan thithruai.

April 7, 2016 Thursday: Khampat le Tuikhing le Kantaza ah Chin Funtomnak Bu upa he kan leeng hna.  Tuikhing khua cu Komen hartuarnak a ingmi an si.  Nihin tiang inn lo an ngei kho ve rih lo.  Daw Khin Kyi Foundation nih inn sakpiak an timh hna.  Biakinn an ngei lo.  Inn 30 ah hin khrihfabu 6 an uk caah biakinn sakpiak awk an tha lo.  Si peknak inn fa nawn te sak piak an hau.  Hartuarmi hna nunning hmuh ahcun khuaruah tam ngai an si.  Kantaza khua a chak le thlang ah Komen hartuar Kawlmi chungkhar tampi cu inn an sak piak hna.  Sianginn zong an sak piak hna.  Kantaza khua hi Kawlmi nih an det ngai te hna lai.  Kilven le bawmh hau an si ve.

April 8, 2016 Friday: Lai Baptist Church, Kalaymyo ah Chin Funtomnak Bu he tonnak kan ngei.  Riantuannak kong zong kan i ceih hna.  Thal chung ah rawl cawk ding in Chin Relief and Rebuilding Committee [CRRC] nih kan fialmi hna cu $ 50,000 in facang tha mi tun 2000 an cawk i Hakha Rescue Committee sin ah ka cam chung ah an kuat colh.  HRC nih inn an hlan lai i fur caah an chiah lai.  Lam hi fur ahcun a chia than te lai ti a fiang ko.  Hi program kan tuahmi cu Pathian remruat a si ko lai.  

Bawi Khrih rian ah,

C Duh Kam, GS

CBCUSA