KEI KA CAAH CUN KHUARUAHHAR LAWNG TE!

1991 Christmas Holidays ah Princeton Theological Seminary, New Jersey ah sianginn kaipi hawi Mirang kan hawi le nih ramdang siangngakchia 40 hrawng cu Washington, DC ah ni hnih chung an kan lenpi. Vawlei cung khualipi Washington, DC hmu lo in nan ram ah nan tlun ding cu a si kho lo tiah zawnruah tuk in an kalpi. Baltimore, MD ah India hna inn ah kan riak dih. An tuang ah kan sleeping bag te cio chung ah kan it hna. Zan ah Methodist church ah pumhnak kan ngei. India pa professor nih phung a chim. Hla sak ah kei nih tingtang ka rak tumpiak hna. Ka no lio a si rih.

AD 2000 cu zeihme kan lawh lai kan ti cio. Caan a dong lai a timi thawngtha chimtu um pah lengmang a si. Kan zumh theng lo zong ah kan thinlung ahcun a cam pah cio. Nain, Laimi kan caah kum zabu thar ah a cang. America ah kan ra hna i Washington, DC ah Chin khrihfabu 20 hrawng a um kho. Vawikhat lawng leeng ding in ka ruahmi Washington, DC cu pastor rian ka tuannak hmun ah a cang. Lai khuapi pakhat ah a cang. 

Nunnak pek in a kan khamhtu Bawi Khrih ruang ah a si. Khrih hling luchin cu Laimi kan suiluchin, Khrih mualphonak cu Laimi kan sunparnak. Kei ka caah cun Pathian khuakhanning cu ka khuaruah a har thluahmah tawn! Bawipa ka thangthat.

A tang hi DC ah vawlei cung cherry phun tling an par lio a si. Pu Van Thawng Cung (CBMC) nih kuatmi chung in lakmi. Lairam khi phaizawng par le chokhlei nih aa ngaih tukmi ram a si. Rungtlang bo chuah ah maw, Falam lam lei Hniarlawn khua lu zawn ah maw, cherry kung cu Lai mino nih cing ve hna sehlaw Washington, DC tluk in aa dawh ve ko hnga. Tourist tampi nih len an duh lai i Lairam hunchonak pakhat ah a cang ve te hnga.